Tuesday, December 28, 2010

Baar baar aati hai mujhko

Baar baar aati hai mujhko
Madhur yaad bachpan teri
Gaya legaya tu jeevan ki
Sabse mast khushi meri

Chinta rahit khelana khaana
Woh phirana nirbhaya swachchanda
Kaise bhoola jaa sakta hai
Bachpan ka atulit aanand

Oonch neech ka gyan nahi tha
Chua achchoot kisne jaani
Bani hui thi waah jhopadi
Aur cheethadon me raani

Kiye doodh ke kulle maine
Choos angutha sudha peeya
Kilakaari killola machaakar
Soona ghar aabaad kiya

Rona aur machal jaana bhi
Kya aanand dikhaate the
Bade bade moti se aansoo
Jayamaala pehenaate the

Main roi maa kaam chchod kar
Aai mujhko utha liya
Jhaad poch kar choom choom
Geele gaalon ko sukha diya

Dada ne chanda dikhalaya
Netra neerayut damak uthe
Dhuli hui muskaan dekh kar
Sabke chehere chamak uthe

Woh sukh ka saamrajya chchod kar
Main matawali badi hui
Luti hui, kuch thagi hui si
Daud dwar par khadi hui

Laajbhari Aankhein umanga
Mere mann me rangeeli thi
Taan raseela tha kaano me
Chanchal chail Chabeeli thi

Dil me ek chubhan se thi
Yeh duniya albeli thi
Mann me ek paheli thi
Main sabke beech akeli thi

Mila, khojati thi jisko
He bachpan thaga diya tune
Arre jawani ki phande me
Mujhko phasa diya tune

Sab galiyan uski bhi dekhi
Uski khushiyan nyaari hai
Pyaari preetam ki rang raliyon
Ki smrutiyan bhi pyaari thi

Maana maine yuva kaal ka
Jeevan khoob niraala hai
Aakanksha, purushaarth, gyaan ka
Hrudaya mohanewala hai

Kintu yahi jhanjhat hai bhaari
Yudhdha kshetra sansaar bana
Chinta ke chakkar me padkar
Jeevan bhi hai bhaar bana

Aaja bachpan ek baar phir
De de apni nirmal shaanti
Vyaakul Vyatha mitaanewali
Woh apni praakrut vishranti

Woh bholi si madhur saralata
Woh pyara jeevan nishpaap
Kya aakar phir mita sakega
Tu mere mann ka santaap

Main bachpan ko bhula rahi thi
Bol uthi bitiya meri
Nandanavan si phool uthi yeh
Choti si kutiya meri

Maa woh keh kar bula rahi thi
Mitti kha kar aayi thi
Kuch muh me, kuch liye haath me
Mujhe khilaane laayi thi

Pulak rahe the ang, Drugon me
Koutoohal tha chalak raha
Muh par thi aahlaad laalima
Vijay garv tha jhalak raha

Maine poocha 'Yeh kya laayi'?
Bol uthi woh 'Maa Kaawo'
Hua prafullit hrudaya khushi se
Maine kaha 'Tumhi Khaawo'

Paaya maine bachpan phir se
Bachpan beti ban aaya
Uski manjul moorti dekh kar
Mujhme nav jeevan aaya

Main bhi uske saath khelati
khaati hoon, tutalaati hoon
Milkar uske saath swayam main
Bhi bachchi ban jaati hoon

Jise khojati thi barson se
Ab jaaka r usko paaya
Bhaag gaya tha mujhe chchod kar
Woh bachpan phir se aaya

3 comments:

Unknown said...

This is not your poem and you MUST write the origianl poet's name! else plagiarism is offensive. It does suit to a peot like you. This poem is so old that we heard for generations in our family. Hope you agree and take care! @Chordesai

Unknown said...

Hello Sir,
Now I remember this poem is by Shrimati Subhadra Kumari Chauhan (http://en.wikipedia.org/wiki/Subhadra_Kumari_Chauhan) you may want to update her name in your blogs so that she may bless you for better poetic skills. I am sure with inspirations of such poems you will be very good poet.

Nels Mangalore said...

This is not your poem. I have read this when I was 10 more than twenty years ago. Man come on do u think people don't know this??? I suggest you to delete to save your self reputation on claiming a poets prom to be yours.